|
- 726 - 1448. Febr. 19. Leubus. Vnsere andachtige gebethe mit williger beheglichkeyt. Erbern wolweysen gute gonner vnd forderer, als ir vns denne geschreben habt von der ladunge wegen, dy euch geschen ist vns vormanende eyn sulchs kegen euch abeczuthun vnd kegen euch gutlichen vnd fruntlichen czu halden noch deme als vnsere vorfarn gethan haben etc. Thun wir ewir irbirkeyt czu wissen, das wirs alle czeyt kegen euch gerne gehaldin habin in aller gutikeyt vnd fruntschaft als kegen vnsern guten gonnern vnd noch gerne thun wellen fil me, wenne vnsere vorfaren, der ir denne in ewer vorschreybunge gedencket y gethan haben vnd hoffen, ir wert an vns andirs nymmer dirfinden, ydach bethen wir euch libin hern vnd vormanen euch, an ewern eygen gewissen vnd an ewern selen czu gedenken, vnd czu dirkennen, ab ir sulche czinse, dy do czu dem lobe vnd dinste des almechtigen gotes in vnserm closter gegeben seyn mit gleyche vnd gotlichen besitczen vnd vns vorgehalden konnet, wenne wir yo dorober, got sey gelobet gute beweysunge haben vnd allen den vnsern is nymmer deme wissentlichen were, das vnsere gerechtikeyt euch y entrewmet ader auch von irkeyme vnsern vorfaren queyt vnd losgesaget weret, vnd hoffen auch, das ir selbist keyne beweysunge von vnserm closter dorobir habt. Dach vmb ewer bethen vnd fruntschafft willen off gute hoffenunge, wellen wir gerne off dis mol dy ladunge lossin vndirgehen vnd euch der obirheben, wenne wir getrawen euch gancz, ir wert euch selber fulen vnd wert gedenken, das das lob gotes nymmer storen sal vnd wert vns vnsere czinse gutlichen lossen folgen. Gegeben czu Lewbis am montage noch Reminiscere anno domini MCCCCXLVIII. Orig. Kgl Bibl z. Berl Ms. Boruss. f. 568. No. 134. Urkunden-Buch der Stadt Liegnitz und ihres Weichbildes bis zum Jahre 1455 - Herausgegeben dr Friedrich Wilhelm Schirrmacher - Liegnitz 1866
Zamknij dokument |
